White Board Sandy 林憶蓮 白板 collection of Sandy Lam promotional "WB" singles

Tuesday, January 22, 2008

三蓮展之 92 頭版女郎

全民皆股,是日全線報章頭條浮雲慘霧,不過學區新明講句「有榜未為輸」,我諗林小姐粉絲多數都係長線投資者,冇有怕...
無憂無慮入正題:時光倒流 16 年,回到恆指未過萬點時,當時股市穩步上揚,唱片市道都仲算唔錯,報紙唔係清一式銀行樓盤減肥廣告:林小姐 92 年只係出過一張大碟,報章頭版亦賣足半年:
612
- 正式公佈同華星合作,為隆重其事,包起《電視日報》(顧名思義專做娛樂新聞)外加四大版,頭版全線稿加一版大事回顧,背面兩版係華星其他歌手廣告,仲要用雜誌紙(所以保存得唔錯),我唔食 lunch$$ 買三份,記得當日個記招有陳欣健,林小姐著米白色西裝,同許生合照。

828
- 等餐懵仲未出 2nd plug,千呼萬喚,歌未到廣告先到,不過明眼粉絲如我就覺得有誤導消費者之嫌:「第一位揚名美國 Billboard 流行榜的香港歌手」,明明係日本分支 J-wave Top 100,講到好似真係美國咁就比較誇;不過另外一句就實而不華,恆常不變:「歌聲橫跨香港、日本及全世界的女歌手」

1224
- 出碟後兩個幾月,聖誕檔期頒獎禮在即,曬冷五首上榜歌(計埋<由你開始>,未計<始終一天>):雖然許生如意算盤唔響,華星其實都算落足本宣傳,睇返成套白板 cd 都覺得抵,我都要學楊小姐講句「多謝華星」;三份報紙得返《成報》未摺(可能都快? ),似乎唱片業不景氣亦間接令到二線報章冇得撈(印象中《Sandy '94》就冇賣頭版...)

- 五蚊一張大海報,超抵,不過 by default 有摺痕,因為隨 11 29 日《明報》附送:當年逢星期日都送對開海報,同期《明周》亦有中間海報連訪問,相比就細好多。冇留意幅相係邊個/邊度影,不過都幾典型 poster girl:魚網外加超低 V 背心連皮褲再加碌柱,求其搵個艷星拍就係邪牌(不過就未必係《明報》)
- 呢兩張係 SCMP 校園版份 "Young Post",可能邊日唔夠稿就會整張 centerfold 落去,都不枉我訂足七年(雖然除要交剪報功課外我就只會睇 comics),記得到中四五識幾個同學會交換剪報(多為玉女派粉絲,同我冇 overlap),"YP" 偶有報導娛樂新聞(港台太陽計劃之類),試過搶埋隔離班有成廿幾份相同報導,應該仲存在於家中某個角落...

Sunday, January 20, 2008

墨守成規是沉悶...

新世紀又出精選,掠水之餘又覺得幾勁:邊有本地歌手以非主打精選名義出碟?(其實當中 6 首歌都有 plug 過,只不過唔係頭三隻主打)U2B-Sides compilation 都係拍住 Best ofbonus disc,循環再用雖然成本唔高,不過我都好懷疑市場潛力有幾大...
上一隻《看見林憶蓮》亦非常搵笨:幾隻 so-called 罕見歌曲/instrumental 24 首鋼琴版炒埋一碟,令我諗起早幾年興過一堆音樂盒 cd... 何況純音樂版應該冇版稅俾林小姐(?),更加唔應該支持!
這些年來倒累積唔少 official instrumental versions,有曲冇詞,林林種種,列表歸類如下:

還有 [純音樂版] ~ 一分鐘都市 一分鐘戀愛 [和唱版] ~ 卡拉依然OK ~ 前塵 Karaoke ~ 只要我活過哭過 Reprise ~ 要是有緣 ~ 回到愛的世界 ~ 寂寞派對 ~ Dakaratte [karaoke] ~ Doushiteyo [karaoke] ~ 開始 ~ 此情此景 ~ 流逝 ~ 愛情.童真.夢想 ~ 願 [音樂] ~ 紅玫瑰の慾望之翼 ~ 紅玫瑰の還君芳心 ~ 紅玫瑰の夢醒無痕 ~ 紅玫瑰の迴旋 ~ 紅玫瑰の心饞 ~ 傷痕 [演奏版] ~ Pieces of Mind [Incognito Remix - Instrumental] ~ Overture [from Remember] ~ I Swear [Instrumental] ~ 誘惑的街 [Instrumental] ~ 飛的理由 [鋼琴演奏曲] ~ 鏗鏘玫瑰 [karaoke version] ~ 有淚盡情流 [演奏版] ~ Track 1... Incomplete

1. K 版,純粹拎走 vocal,原曲冇任何改動;分別出現於華納 remix albums、日本 singles、滾旦大碟(通常係 track 10)等,有聲冇畫面冇歌詞字幕,唔知有冇人會播住隻碟開咪唱?
2. 編曲不變,只抽取一小部分作大碟開場(Overture)或結尾(Reprise)之用,首尾呼應:<只要我活過哭過>同<Remember>都係一頭一尾,不過一首係頭,一首係尾。
3. 音樂編排同原曲唔一樣,連歌名都改埋;同一隻碟多一個變奏,提高可聽性:<寂寞派對>緊接<假如讓你吻下去>固為經典,倒是<要是有緣>配<寵愛>亦出奇地夾,<愛情.童真.夢想>則曾被小弟作大學話劇配樂之用。
4. 冇原曲,特別作一段音樂過場,就係《關於她的愛情故事》許生三首作品,從開始到流逝,回憶總是溫柔的此情此景...
5. 電影/電視劇歌曲配樂,最出神入化當然係小蟲五首紅玫瑰變奏,完全配合王嬌蕊迴腸盪氣的一生;另外幾套小弟冇睇過,硬係覺得冇憶蓮把聲爭少少。
6. 最後呢個類別係憶蓮開腔(雖然我一直都聽唔出<夢醒無痕>係佢自己唱):一句「只要我活過哭過」總結了野花燦爛的一生;<Incomplete>把 Track 1 留白,15 張廣東碟有 5 張都係由林振強寫第一首...

好大程度上因為<鏗鏘玫瑰>K 版而買呢隻滾旦二千精選... 放大側紙睇到其中一句大意係「聽好歌又開心又可以學中文」,點樣學?呢首 K 版歌詞註明普通話讀音,連聲調都標埋,不過唱 K 都唔跟聲調,唔通對住個咪朗誦?

Saturday, January 12, 2008

海報三蓮展...

心血來潮想去沙田(小弟 00-02 年的學業/事業基地),知道文物館有「歌潮‧汐韻 - 香港粵語流行曲的發展」,一石二鳥;發現《灰色》12" 大碟原來係香港博物館藏品(somehow 我又真係冇呢隻),不過最強係有倫永亮提供手譜<依然>同埋<燒>,冇歌詞只有音符,點知唔俾影相 -_- 惟有筆錄詭異之處:
- <依然>LP version Alex de la Cruz 編曲,於是倫生呢個版本大有可能係為演唱會而設,我估係 9196 年,93 年連住<沒有你還是愛你>,於是機會較微;
- <依然>同<燒>係用兩款唔同五線譜,前者係「Golden Pony」,後者係「Doluna Productions」,一間係幫倫生出碟,另一間係佢自家製作;印象中<微雨撲巴黎>版權係華納,要到<沒有發生的愛情>至係 Doluna,因此估計 Doluna 91 年成立,如果咁即係話<燒>唔係 LP version89 年)份譜,即係話又係演唱會,鑑於 9396 年都冇唱,於是可能(又)係 91 年。
- 當然亦有可能 N 年前已經有 Doluna 呢間公司只係冇擁有歌曲版權,於是<燒>份譜係 LP version;當然又可能兩份譜都係 91 年演唱會,都冇話同一個演唱會唔俾用多過一款五線譜;當然係 02 年演唱會亦冇話唔得(當年用唔晒),反正我都只係估估下...

這邊廂不准拍照,對面「超越二度空間 - 2007 香港國際海報三年展」就任影唔嬲,淨係上面呢幅麵包扮大魚大肉就已經值回十蚊票價;兩場展覽做到五月,三月中仲有場流行曲發展研討會,講者之中有朱耀偉教授同周耀輝先生(未係博士),歡迎參加。
小弟買 CD 通常都唔介意俾多十蚊要埋張海報,咁多年儲埋都真係多到唔知擺邊;呢期屋企大裝修,於是注資展開大型保育工程(其實只係每朝搭的士將大堆雜物搬返 office),先晒冷出土三張中古海報:

- 呢張未算十分罕有,不過就見證了小弟輕狂的少年歲月:如果近睇會發現林小姐嘴唇部分出現爆擦,後面貼住膠紙(題外話:eason<熱島小夜曲>中「膠紙」同「膠布」是否同義?)當年彌敦道海報黨我亦係要員之一,隨身攜帶 cutter 視察四周隨後落手,手頭上有四張街頭爆擦版本,後來唔知邊度搵返張美白版本;不過亦唔係次次咁好彩,《天地野花》張宣傳海報我就一直只係得流落街頭版(有冇人有多想 trade?搵張《Love, Sandy》同你換...)- 呢張斷估唔係俾錢買,唔通捐血有得送?幅相係<假如讓你吻下去>白板同一輯,即 93 年,紅十字會每年到敝校一趟,有餅食又可以走堂,小弟實幫襯,不過冇印象呢張係咪捐血贈品。四大天王之中,蓮城一線肯定最具台型,至少高度相襯又跳得;同學友就真係似兄妹,尤其是十年前那次叱吒,今年首<K 歌之王>差好遠。- 信和有間橫浜專賣日本碟,屹立地庫轉角位多年,友人HY 不知以美色還是利誘成功買下呢張 どうしてよ [doushiteyo] display poster(雖然當年我覺得 だからって... [dakaratte] 靚好多而冇買呢隻 single),成為小弟多年來最驚喜生日禮物之一;值得一提呢張係重磅紙,比一般本地海報厚身,家中亦只得呢張海報會特登用個紙筒入住。- 不覺十數載,紅顏未老,今年 2.9re-u,不知 HY 會否現身?