06...

其實叱吒現場投票同800人選委會差唔多，所以聽晚要有 strategy，以防唔想其當選者殺出；不過呢度就梗係任我揀啦：

陳奕迅 - 最佳損友
Wyman 對人唔對事（雖然《本色》都冇佢份），不過做朋友本該如此；我自己當然唔好得去邊啦，所以呢首我會頒多個最佳歌詞以表揚心術不正如我之損友。

關淑怡 - 進化論
難得再有一個關淑怡演唱會：倒敘 rundown 第一首，愈唱愈好可見近年已達曲高和寡的技巧層次，近日見有評論過度個人化的歌詞難以產生共鳴；我都覺得 autobio 係一次起（〈關於我〉）兩次止，不過問題係有冇機會得到第三次呢？

古巨基 - 花灑
令我想起（並懷念）「復出」前的古巨基：究竟近乎4張碟都係林夕寫詞、林海峰做 design，可會是基於一份迷信？忘掉奮鬥過要隨緣...

陳奕迅 - 落花流水
平淡的曲，不平凡的詞；不過這首詞正需要一首平淡的曲，如落花交會流水。

楊千嬅 - 大傻
升 key… 《Unlimited》貴為林夕晒冷之作，楊千嬅分飾大小女人，呢首屬於後者：〈簡愛〉小販走鬼版，窮得漂亮。

林憶蓮 - 一個人
巧合地個人化，但理應唔係 autobio（如果係都應該屬於周耀輝自己...）；不過既然憑感覺行事，《呼吸》肯定係繼《夢了瘋了倦了》之後最強烈的一次自身寫照。

陳奕迅 - 裙下之臣
年頭帶到年尾，除了Eason仲有Wyman，前者覺得呢首歌好 typical 由林夕填詞，我覺得應該係好 typical 由王菲唱；不過個 MV 令我覺得呢個年代真係冇一個歌手可以配合形象去表演一首好歌...

林憶蓮 - 不敢奢想改變你
呢首歌應該屬於05年尾，不過我總覺得及不上〈還是我還是你〉，到派台宣傳後先至慢慢接受；其實兩首同樣classy，亦令我想起（又懷念...）《Perhaps》、《純真傳說》以至《180°+》那個 Mark “Versatile” Lui...

揀唔到10首，年中無休繼續聽《本色》同《呼吸》，沒完沒了... 以下幾首覺得唔錯，但未能與上列相提並論，只順帶一提：劉浩龍〈恢復自由〉、王菀之〈詩情〉、許志安〈大愛〉、薛凱琪〈小峽谷之1234〉；冇派台首選：〈亦舒說〉、〈如果可以不停相愛〉、〈不如留低我〉、〈不如不見〉（究竟見定唔見好呢...）