道歉啟示...

喜歡的歌手伴隨我們長大，部份歌迷都會結婚生仔，有自己家庭、事業之餘仍然保持著對歌手的寵愛（或是忠貞），長情本身也是美德：憶蓮、美君、淑怡、千嬅迷皆如是（唔係點可以買齊佢 a music 三隻碟？）
於是四歲小朋友大可以識唱＜浮花＞，雖然佢應該冇半秒會想放棄生命；於是歌迷可以扶老攜幼（或眷，可以兩個人一齊去睇其實好幸福）到場支持歌手，不過唔代表可以當係久別重逢私人聚會閒話家常傾足大半場，尤其當台上歌手唱緊滄海遺珠如＜不可能說的夢＞、＜事前＞等，小弟成世人都未必再有機會聽佢現場唱（段估呢班歌迷都唔係同佢熟到會匿埋K房真身演譯，你估真係＜自甘墮落＞個歌女咩？）
於是小弟諗唔通，唯有出聲。上次係 live '07 第七場，今次冇講英文算係咁；不過話人者是，小弟都要告解自己一樁惡行：話說 '07 第一場同 m & ple 姐睇 $480（另幫朋友買兩張 $680），大半 side tracks 兼編曲改到七彩，興奮程度可想而知，於是兩個蓮迷加一個夕迷（或者係兩個女人加一個狂迷）齊齊估歌，最叻梗係我，連＜天衣無縫＞都估到，不過中場見後面觀眾黑面都有所收歛（定係佢係因為首首都唔識而黑面呢），不過諗番都覺得騷擾到人係小弟唔好，謹此致歉。
呢個故事教訓小弟：演唱會一定要睇頭尾兩場，仲要買貴價飛同歌迷會坐前面；如果朋友唔肯陪你睇咁貴就要撇，因為佢同你唔係咁熟兼會阻住你；你係去聽歌，聽／睇現場演譯，心情好像吹不滅的蠟燭，當天只有著你我。