是時候叱吒一別...

94 年度係憶蓮最後一屆入圍叱吒最高播放率女歌手（王菲金、彭姑銀），95 年 1 月 1 號頒獎酒會佢冇出現（當年係個酒會，小鳳姐做客席主持；得獎歌手上台排排坐，好似連歌都冇得唱...）到 17 號去紅館搞多場「叱吒樂壇演創會」，現場觀眾由 20 首全年播放率最高原創作品票選我最喜愛歌曲同我最喜愛演繹大獎，分析賽果前先同大家重溫一下排名不分先後：
沒有季節的火花 - 如果得不到愛情 - 祝福 - 個個讚你乖 - 我願意 - 決心 - 情歸何處 - 那有一天不想你 - 用心良苦 - 我不是一個人住 - 你是我的1/2 - 忘情水 - 只有你不知道 - 誰人知 - 終有一天感動你 - 怎麼天生不是女人 - 鐵幕誘惑 - 橫濱別戀 - 笑說想 - 我等到花兒也謝了
- 因為只計原創作品，女歌手未鬥先輸：FW、CP 被迫換畫（＜夢中人＞、＜讓我跟你走＞肯定受歡迎得多），SY、SK 三甲不入就更加冇份（＜繾綣星光下＞、＜女人的弱點＞就算係冠軍歌亦冇得留低，後者係咪算原創當年亦有所爭議）
- 男歌手都係四大天下，當年劉華同商台仲算 ok，只屈居於學友，城城三甲不入不過有成三首入選廿大（當晚觀眾席坐正俞琤隔離唔係安娜而係啟華），Leon 一曲獨大兼有家族撐場，獨攬兩大獎（冇錯，演繹大獎都係佢），果然係一場遊戲...
- 香港歌手唱原創國語歌，台灣歌手唱原創粵語歌（其實係改編自己首國語歌）；憶蓮走在最前，＜決心＞（同再上一年無端端唱＜暗示＞都）係名副其實 made in japan，加埋一身《love, sandy》套裝，你話係咪應該頒多個 xxy 亞太區最受歡迎女歌手獎先？另外始終要讚商台多年來俾新人唔少演出機會（雖然幾年後演化成催淚環節），趁點票期間各生力軍輪流上台獻唱，仲有前輩歌手訓示，配對題大家齊齊玩（估中冇獎）：
吳倩蓮 - 張崇基／張崇德 - 曹永廉 - 孫耀威 - Girl Friends - 風火海
｝憶蓮 - Leon - 城城 - 學友 - 劉華 - 草蜢