我不會說 cut...

終於睇番金像獎足本播放，其實無記剪接咁有心機 cut 走亞視部分，如果中間唔播＜天若有情＞同＜追＞（唔代表呢兩首唱得唔好）然後臨尾加番＜緣份＞就神不知鬼不覺啦（至少電視機旁邊觀眾未必察覺）；睇下 95 年 2 月上勁歌，原本兩首加埋九分半鐘都可以濃縮到五分鐘搞掂，有齊 verse A chorus 起承轉合，難得林小姐仲要奉陪唱 live（反而主打＜傷痕＞只係夾口型），此後神檯下凡通常都少不免先炒碟舊歌 cut/paste 大串燒。
小弟主觀願望成日想林小姐唱＜追＞，以為今次係大好機會，點知又冇份；唱過咁多首電影主題曲， 89 年呢首＜成長路＞都算頗為吊詭：似係無端端回歸新力早期，完全唔 match 都市觸覺形象（因此只收錄於白金精選），查實四位《我未成年》女角有三個後來都算出過下唱片，唔通係導演林德祿對憶蓮情有獨鍾？（《香港舞男》仲有首＜夜生活＞，兩套男主角都係任達華）