我懷念的 - record mongers

雜誌名稱不詳，不過應該係 92 年左右（其中一幅相見到關淑怡《製造迷夢》），都算係本地唱片業全盛時期，至少我自己買唔少。
小學大部份同學都入喇記，得我嫌個名譯得難聽（雖然學校名同條街名一樣又好似幾勁）唔揀，單拖做 DB／MK 仔，亦間接陶冶小弟的音樂性情（如果返九龍塘又點可以 lunch 都落去行唱片舖？）- lunch 多數行女人街威威同添記，信和大部份都未開舖，寧願放學先去
- 印象中威威店（定係添記？）試過兩面街都有舖，一入到去兩邊有大櫥窗係唔同唱片公司 showcase；唔知點解誤以為威威已經摺埋，早幾日特登去睇睇原來依然屹立女人街（反而係附近其他舖頭唔同晒），仲俾我搵到隻特價吳浩康《Deep in the Music》
- 細個少去荷里活中心，總覺得上樓舖有黑店 feel，特登行上去唔幫襯又好似唔係咁好；反而近年鍾意去節拍執平碟，不過唔再係 cd 而係 dvd（二區碟成日要估日文／法文譯名）
- 信和試過有成廿幾間唱片舖，亦試過有成廿幾間賣四仔，而家都算成功轉型啦；咁多年仲有得留低除了橫浜應該就係迴音閣，以前對住橫浜（下圖，仲見到有賣唔少白板 cd：我認得有＜touch＞、＜不來的季節＞、＜對你愛不完＞等），後來進駐一落地庫電梯位，可能租貴唱片亦貴幾蚊，小弟亦開始少幫襯
- 近年已少買 cd，ipod 亦冇乜新歌，不過要買碟亦會去番信和（多數去舖頭仔，鍾意人多夠逼，錯覺唱片業繼續興旺），慳幾蚊不過蝕車錢，始終有感情分啦；以前放學會去上一層中間轉角位一間舊舖打躉，幫老細陳生收錢（其實生意唔多）同埋洗黑膠碟（佢有部洗碟機），冇人工不過可以自己打碟聽歌，幫襯白板碟都冇乜折頭
- i feed on music, what do you feed on...?