忙しいが, 楽しいです

正所謂有得睇好過冇得睇，大細聲亦好過冇得聽，於是決定照 post 呢段唔清唔楚 93 年台慶天后大鬥法：難得聚首少不了互相對唱，SY 唱＜傾斜＞同＜summer of love＞都有下過功夫，憶蓮唱＜不再兒嬉＞亦有板有眼（＜信自己＞變相大合唱擺明大細超啦...），王菲招牌式夢遊唱跳皆求其；不過反正唔係唱 live，主要都係睇頭兩位勁舞：SY 一拖十比憶蓮多一位 dancer，不過做憶蓮 dancers 絕對唔簡單，冇轎抬就要靠人手，仲要短時間內變身，三首歌竟然有三個 look（雖然只係除衫、頭巾同換帽），咁落本都似係星工廠私伙（第一套衫曾出現於＜天大地大＞）。我諗星工廠都算係舞蹈界哈佛耶魯之流，系出名門，有衫換亦係專業表現；憶蓮咁勤力，跟佢跳舞都一定受過艱苦訓練，不過正所謂唔辛苦邊得世間財（或才），做得呢行或多或少都係寓工作於娛樂，祝各位現任 dancers 忙個不亦樂乎（即係憶蓮繼續唱啦...）。