98 / 94

近日周圍搵陳年 boy band 98 degrees 精選 cd，無論係 d 字頭 n 字頭 a 之前 z 之後都冇發現，唔通已經絕版？
搜索過程中反而無意在威威店發現《sandy ’94》頭版，全新未開封只售 $105，雖然封底右上角輕微泛黃，不過照買：歌迷朋友如果冇呢隻可與小弟聯絡，等價交易不作炒賣；就算冇人要，買多隻做陳列品都抵啦。
倫、林多年來雖然合作無間，不過《sandy ’94》可以話係唯一一張大碟名正言順二人包辦（之前 city rhythm 始終係由許生統籌，之後就到李生掌舵；呢方面倫、梅合作關係相對地更為緊密）；其實倫生作歌俾憶蓮亦唔算多，每張大碟都係一首起兩首止，當中流行程度最高應該係＜燒＞（＜傾斜＞唔算啦），最受粉絲們愛戴可能係＜沒有發生的愛情＞或者＜微雨撲巴黎＞（小弟偏愛後者），至於最唔鍾意呢，我估唔只得我會揀呢首：作為 track 1 / 3rd plug / 推介歌，硬係覺得爭少少：同著住套衫一樣，個 trend 似乎略嫌過時；或者係同碟太多歌可以揀，＜芝加哥的故事＞、＜沉淪＞以至＜感情不老＞都各有特色，應該可以帶來較大迴響，＜多些那些＞只能算係穩打穩紮 adult contemporary，但唔能夠深入民／迷心... 睇下有冇借演唱會還魂之日？