嘩嘩嘩!!!
小弟向來只儲打從華納以來各式白板碟，市面上偶爾流傳遠古時代宣傳品我都冇買，不過呢隻呢...
碟如其名，得塊白板，連歌詞紙都冇張（或已遺失？），考古學上唯一線索就係靠個 CBS/Sony label 驗明正身。
黑膠碟 label 都冇名，放隻碟落唱機聽過至證實係 4 分 10 秒 LP 版本... 咦，點解隻碟兩面都有歌？原來呢張白板碟兩面收錄同一首歌，可能係方便 DJ 求其一面都播得。
說來慚愧，一直都唔知（或者話係完全冇留意）呢首歌竟然出自潘源良先生手筆，可能實在覺得太唔係佢風格；不過回看新力時期，佢都算係配合形象交足功課：頭兩張大碟完全係西瓜少女，跟住即刻 180˚ 轉變得決絕獨行，其後合作無間，幾乎每張廣東大碟都有其作品（唯一例外係《F&P》，事實上佢所有歌都唔係咁都市觸覺）：
愛情 I DON'T KNOW - 無聲約會 - 愛神 HOLIDAY - 快快救我 - 偷吻 - 獨行少女 - 決絕 - 早晨... - 戲假情真 - 祇可活一次 - 他 - 命運是否這樣 - 還有... - 又見朝陽 - 痴纏 - 為何相愛 為何結束 - 無憾 - 我要等的正是你 - 沒有發生的愛情 - 躲起來 - 風中的歌 - 我沒有恨誰 - 暗示 - 沉淪 - 赤裸的秘密 - 明天醒來時 - 感覺完美 - 時光本是無罪 - 不敢奢想改變你 -
產量以致整體而言，潘源良雖或算不上憶蓮的 soulmate，派台歌亦唔算大 hit（02 年演唱會 tribute 四首之中三首都冇 plug 過），但其細膩的筆觸倒是寫活了不少動人的愛情故事（畢竟係編劇出身）；詞作雖以中慢版歌為主，不過一首＜沉淪＞側寫情慾亦跟另外兩筆管不遑多讓，更加唔少得 SK＜叛逆漢子＞、＜夜迷宮＞、倫伯＜愛情陷阱＞啦。
＜風中的歌＞可以話係唯一一首演唱會 grand finale（＜戲假情真＞無心插柳都係佢），如果上面個表今年只唱一首，我會比較想聽＜暗示＞定係＜時光本是無罪＞呢？

題外話：有篇訪問提到「張學友和林憶蓮的第一首歌，都出自他的手筆」，似係講緊＜情已逝＞，不過印象中 first plug 又好似係＜SMILE AGAIN 瑪利亞＞（卡龍填詞）... anyway，至少 SL 同 SK 一定係，LL 搭上 Mark《Perhaps》頭兩首令人眼前一亮都係。