一個時代的____

將 ipod 裡聽了過百次的＜山水＞、＜天規＞刪除（歌迷們早已將白板碟版本互傳，畢竟當時都唔知要等到幾時），將 cd 放進電腦，重新轉做 mp3，感覺上比較抵；ipod 自動 retrieve data 如上，冇年份、part of a compilation，描述正確（舊年三首歌冇出碟，翻炒《十二金釵》同＜只得一次＞甚至已經係兩年前）；兩首 remix 好玩，但原版已經玩得咁盡亦難有太大驚喜，宣傳 tag 係「14 年來首張全新個人廣東大碟」，可能大家對「全新」同「大碟」定義唔同啦，對小弟來說的確只係新曲加精選，如果話等咁耐係等歌詞，咁＜地盡頭＞都肯定交足功課（「前度誇獎灑脫」係咪講緊唱片公司...? ），其實《ex》之後仲有隻《ezone》俾寶記分拆上市（有＜非愛不可＞、＜雲上舞＞、＜月光曲＞之類，呢張碟當年如果出得成都相當國際化），由化整為零到化零為整，難得有一隻關淑怡廣東大碟。
cd 冇乜新歌，諗住有 dvd 睇下都好啦，不過＜地盡頭＞mv 真係 n 個唔得... 惟有睇住舊片先：小環、綺虹呢段無論舞步同造型都令小弟諗起 'Vogue' GS 版；＜情人＞呢個版本應該係央 B 台有限資源下製作，算係不過不失，亦可以諗番呢 15 年佢如何進化成一個 vocalist。
不普通的都失蹤... 咁樣講雖然好奇怪，但有一刻小弟由衷慶幸 sk 只係第二最愛，至少還有《本色》、《呼吸》、live '07/8/9...

回來吧...

相關語...

上回講到跟東昇同學相識近廿載，轉個頭就見佢上鏡背負「事旦」之名（猶記得佢以前上辯論台前那種認真神態）；不過小弟依舊支持央視 B 台！話說日前收到 utube 電郵：

親愛的會員：
謹此通知您，由於央視 B Ltd 發出了第三方通知，聲稱以下資料侵權，因此我們已經移除或禁止存取此資料：
翡翠歌星賀台慶 91 : utube/watch?v=*\&%^}#$xXy
請注意：多次侵犯版權會導致您的帳戶及上傳到該帳戶的所有影片遭到刪除...（下刪數十字）

萬千感激 B 台網外開恩，冇封殺憶蓮片段，小弟以後唔敢喇，承諾 will be away from utube indefinitely，軟硬同 eason 咁多人睇實唔敢再 post，以免蓮教受牽連／取締... 為表對 B 台事事擁戴之誠意，最多小弟唔取消收費電視啦，河蟹有理！

15,20

東昇和我相識於 89 年，中一分班試都被派到 C 班，1A 班大都畢業於直屬小學，B 班有一半同學修讀法文，所以 C 班都算係中堅分子（當然長大後各有修為造化）。東昇同學能言善辯，興趣方面佢同其他同學會研究賽馬（唔係賭），小弟則酷愛音樂（不過合唱團冇揀我）；閒時我們會玩 D&D、手網球（窮學生以手代拍）之類。
七年中學生涯我們只有中二唔係同班，佢升到被定性為中文班的 2B 班（因為 A 班同學英文超強，B 班英文相對地冇咁好，美其名就被譽為中文叻），小弟中文唔掂繼續留在 C 班，到中三先至升 'le'；我們當年是某學會 exco，搞時事常識問答比賽，小弟會憧憬到中六時佢做會長，我做 internal vice之類（原來由細到大都係鍾意做庶務二課／阿四），可惜呢個學會涉嫌踩界，不知從何渠道請了現任疑似特首候選人梁先生到敝校演講，但並未知會校內高層：做事唔跟 protocol 喎，最終於同年被有關當局取締。此後東昇同學主力做中文學會同辯論隊，小弟則蒲信和並從事民間工作，佢讀中史我修會計，各有各忙但亦會留意對方近況；JUPAS 放榜佢去中大我去港大，畢業後很少聯絡，我到清水灣工作時電視城已逐步撤離至將軍澳，唔計睇電視最近一次見面係前年同學新婚盛宴。不過我仲記得佢早幾日生日（雖然近年冇寄卡），同埋佢以前屋企電話號碼。
印象中東昇同學絕對係謙謙君子，有神聖光環那種（所以適合做呢行）；不過最記得反而係佢鍾意玩 15,20，佢贏我多數靠技巧，我贏佢多數靠運氣：生活之中兩者同樣重要（技巧五花八門，讀書游水音樂跑步皆可），我想我是個幸運的人。
20 年前：身邊的人都為我被派到這間中學而慶幸，in fact i still don’t (and won’t) know which is better, being a mediocre student in a band I school or being a top student in a mediocre school… anyway, that’s my own choice
15 年前：《sandy ‘94》面世，跟《鏗鏘玫瑰》一樣，是一個異數，gotta try something new, out of the box, from scratch, making my own choice(s), deterministically...
今年係 Dan Ryan’s 成立 20 周年（free iced tea & tiramisu last nite），原來 CC-ATV 不覺亦已 15 年... 今日剛動筆簽約在清水灣做多兩年，莫失莫忘