07 情事...

桌上剩下... 我的（十樁音樂）情事：

月球上的人 - 呢首歌 1 月上叱吒榜，跟住自動消失讓路予＜黑擇明＞（2 月冠軍歌），3 月再度上榜，4 月成為冠軍歌，緊接有＜淘汰＞... 商台幫到出面啦；不過以歌論歌，係我年度派台歌首選（雖然淨係得商台播），「moving on stage」 演譯妣美 cd，雖亦為此演唱會之敗筆，相比之下「又一個叱吒十年」唱得更盡更放（有競爭才有進步？）

陌路 - 咁呢首可能係我的四台聯頒歌曲大獎（聽講勁歌季選都有份...），雷生夕爺機關算盡都救唔返《meridian》（據字典可解作 'midday' 或 'a high point'，不過據稱封面係晨咁早上山頂影，第二個解釋就屬於當代小說常用之一種修辭手法：反諷），如果呢首係 2nd plug 會唔會冇咁傷亡慘重？

熱島小夜曲 - 一首歌五個製作人都幾誇（＜滑鐵盧車站＞仲多一個，不過我稍為鍾意呢首），而填一首果然好過填晒成隻碟... 如果演唱會有個機關撈波兼唱晒成首會比較型；中村光夫：「我以為不要寫第十章燒金閣寺的場面不好嗎？」三島由紀夫：「但是，中斷性交時身體是有害的啊！」

別阻我開心 - 這是楊小姐的真人真事：心情唔靚，買張頭等機票漏夜飛去倫敦（Paco 仲未知），探訪好友，然後返香港繼續工作，冇事發生... 於是我唔介意佢唱歌時好時差，甚至唔介意一年出兩張碟鬥差（因為我仲聽緊《unlimited》），因為我鍾意佢個人／份人，只怪我一心愛人...

Travis - 我自己的真人真事冇咁灑脫：只係搭經濟客位，都要問准老闆；不過我咁大個仔都係第一次覺得要去旅行（睇憶蓮巡迴演唱算係 duty trips 唔計）。去 Paris 一個小場館可能比 Glasgow 一個大球場好睇，感覺上似 PSB Performance；街頭萬個歐洲路人，說不出旅行的意義，誰人還值得想念...？

Unkle Bob - support Travis tour 隊 band，當時淨係覺得把聲幾勁，但音樂好嘈；點知返香港有一晚睇 Grey's Anatomy 竟然插播 'Swans'，覺得熟口熟面，但唔知係乜，不過現代科技先進，搵一首歌基本上冇難度。thx to EY for buying the album from UK，幾似 Travis 第一隻碟，不過更 melancholy...

My Stories - 我鍾意 Oscar 把聲，未聽過佢唱現場（亦唔覺得會唱得好好），不過覺得佢把聲好聽；呢隻碟令我想起《life continues...》（an inferior version？），＜險＞係典型 Jerald 風格，慢歌就只係一般，＜有時好...有時差＞曲詞好...咬字好差，整體及不上《we are Bliss》，不過我都係鍾意佢把聲...

我懷念的 - 我最喜愛 K 歌大獎：本來唔識呢首，偶然去 K 聽到友人 KF 演譯，之後我每次去都唱（其實「每次」都只係得兩次咁多，ipod 隨身唱就多幾次）；可能係 MV 拍得靚，可能係歌詞到肉，可能係唱得聲嘶力竭，更可能係旋律動聽（「自尊常常將人拖著 把愛都走曲折」一節）我諗我今晚都會唱...

預言書 - 我去 K 唱得好過原唱大獎：雖然小弟冇睇過萬能俠（31 or 鐵甲），亦唔係大過 Kenny 好多（睇唔出佢都成 27），somehow 我覺得我睇完份歌詞會感動，有感情就自覺地唱；唯一及不上就係我冇試過同張敬軒同一屋簷下啦...（google「關智斌」自動彈出 keywords 竟然係「張敬軒」112,000 條同埋「gay」8,460 條 -_-）

憶蓮演唱會 - 不願遺棄 也不想忘記... 十個晚上，一生難忘；期待將來再有快樂的日期 讓我勇敢地去面對自己...

蓮誌 7b - 今夜聽甚麼歌...（二）

《Quotables 豁達音樂誌向》為商台於 94-95 年間出版的雙周刊，衍生自以播放外國歌為主的「豁達音樂天空」，記得憶蓮 94 年參與過其中一集 Sat Nite Live，因此估計呢篇訪問應該差唔多同期，事隔十幾年亦有跡可尋：
- 呢頭話最喜歡 Incognito，第二年就有機會合作＜Pieces of Mind＞remix，定係當時已經 confirm 會做呢？我自己稍為 prefer Jamiroquai，雖然亦認同其重音樂多於唱腔，不過我覺得 Jay Kay 本身把聲就好突出，純粹個人喜好啦
- jazz 最好玩係任何樂手都可以一齊 jam，Bob James (keyboards) 係 Fourplay founding member，Larry Carlton (guitar) 就係 98 年先至加入，咁 94 年當然冇人會預計到；除了各自出 solo albums，舊年 Fourplay 亦推出第十張碟，比 Kylie 早 X 一步 　
- 澳洲組合 Frente! 94 年翻唱 New Order 'Bizarre Love Triangle'，憶蓮念念不忘借身還魂成＜一個人＞；另一超級女聲 Misty Oldland 未見新作，繼續活躍的只有 Dianne Reeves 客串 "Good Night, and Good Luck"
- 十年後那個 cd 櫃都幾唔同（雖然應該唔係 full collection），連 Kenny Loggins 都冇，封面抱住個女應該就係 "Leap of Faith"；我個 cd 櫃都已經封晒塵，今夜聽甚麼歌，還看 ipod：

沒有人...

印象中當年好似話有煙草商想贊助「天地野花」，不過主辦單位覺得形象唔夾而告吹，於是變成「Jessica 全情贊助」；查實黎張天王各有兩張 Red Hot Hits 都照係入選十大健康形象啦。　
萬字頭除了寶路仲有事發，前者親大眾宣傳鋪天蓋地，後者則走高檔品味路線，唔係 target MK 飛車黨：當年未興將 pop song 變廣告歌，而電視仲可以賣煙酒廣告，於是有林慕德度身定造 'Freedom'（仲得到官方電台獎項）；然後夜深時分有「萬事發音樂看世界」，幾位長髮中間界主持人（志淙近乎中間界，聽講後來另一輯由夏韶聲主持）介紹外地流行（以至唔係咁流行）音樂，可惜小弟年少無知唔識欣賞；壓軸盛會當然係「萬事發音樂會」（係咪連續幾年都有搞呢？）92 年尾群星雲集（應該唔係為頒獎禮等價交易至俾面出席）：Beyond、JC、SK、PL、SW（當年 coming home 未係 FW）全唱家班仲有倫永亮做音樂總監。
-----------
唔知係咪因為有 Anthony 伴奏，SL 竟然選唱超冷門 'Wildflower'，印象中只此一次，仲勁過 CD 版本；完場大合唱 'That's What Friends Are For'，高八度 ad-lib 應該係 JC，另外有幾首唔知點解 CY.net 有得聽。
官方節目名為「純 in 音樂星光相聚」，賣廣告之餘亦算貼題（地點係海洋公園）。早排睇到篇不切實際雜文提到 SL 作為「icon」唔 come out to show support，又拉埋 Kylie 做唔啦更 x-cultural comparison（你會唔會見 SL 著 H&M 泳裝出場?!）；正如唔接受煙草商贊助都唔等於沒有人抽煙：
仰首一口灌下濃的 gin　手拋去未完的煙
愁懷沒法放開　任煙灰佔滿台
我整夜不能睡　可能是因為煙和咖啡
誰的煙　讓我看不見你的臉
桌上剩下的香煙　還有你我的情事　
十七歲前的誓言　隨著煙走遠...
祝聖誕要快樂的人聖誕快樂~~

蓮誌 7a - 今夜唱甚麼歌 (16th anniversary)

那夜，我們在聽《野花》，她身在東京，沒有唱＜野花＞（日本版冇咁快出）；但她在台上唱著＜夜來香＞、＜天涯歌女＞以至＜三年＞（係咪《憶往情深》那個版本？），畢竟已是真人 show。

今夜聽甚麼歌...（一）

忘了那個日子飄落紛紛...
仲係覺得大部分歌唔好聽，ipod playlist 飛剩幾十首，惟有繼續睇碟：而家一邊寫，一邊睇緊 Michael Bublé "Caught In The Act"；睇番幾個中外 live shows，更覺憶蓮 '07 難能可貴：半數都係 side tracks，有 plug 亦大都唔係第一二波主打，得三四首歌冇乜改編曲，真係外國歌手都未必玩到咁盡。
以下幾首，編曲改到九彩，唱法亦同 album version 完全唔一樣，耳目一新程度同憶蓮有得揮：
Bryan Adams '18 till I Die' (MTV Unplugged 1997) [youtube]
- 90 年代初至中期 MTV Unplugged 全盛，搞到香港有期都興玩唔插電：呢首 rock 變 strings，guitar solo 變 violin；Mr Adams 呢個 show 幾首最紅 ballads 都冇唱（佢四首美國冠軍歌都係來自電影 soundtrack），可能覺得玩得唔夠盡。
~ ＜哭＞+＜決絕＞：坐低唱，有個樂手伴奏，+ string trio（計埋個二胡）

Kylie Minogue 'Come into My World' (Showgirl 2005-06) [youtube]
- 小雲雀跳倦知還，坐上一彎明月，先翻唱 'Over the Rainbow'，跟住到自己呢首 Grammy Best Dance Recording 變慢版；Michel Gondry 個 MTV 太入腦，不過呢個 remake 在視覺同聽覺方面亦令人印象深刻，算係俾 Kylie 晒冷之作：「我跳得又唱得！」
~ ＜寂寞流星群＞：一首快變慢，一首冇 beat 變有 beat，兩首 visuals 都靚，都係半天吊

Madonna 'Erotica' (Confessions 2006) [youtube]
- 繼續跳舞，畢竟已為三子之母，唔可以再搞 SM Girlie Show，於是重寫 verse A，chorus 亦係另一個 dance beat，舞步就變得 acrobatic / gymnastic（gym 固然亦為性地之一種，見 Showgirl）：娜姐一出，誰與爭鋒？
~ ＜匆匆＞：呢首唔係大 hit（'Erotica' 純粹論歌亦唔係），但係都有五六個版本，今次呢個最 groovy；林小姐雖然冇 dancers，但係同 musicians 互動，加埋 body movements，亦為「你令我性感」之一類，本地女歌手除了 SK 都諗唔到第二個可以相提並論

post-live syndrome 入膏肓，持續症狀：腦海不斷浮現演唱會場面，包括影像、字幕、樂聲等；頭幾日完全唔想聽歌，覺得一般流行曲太「流行」而生厭，唔係中文歌又好少少，上星期開始聽Eddie Higgins Trio "Secret Love" 同 PSB "Disco 4"，近日感謝匿名友好送靴又送腿，十個晚上歷在目、猶在耳。

逃避音樂另一種方法係睇戲，有幸睇到 Eytan Fox 新作 "the Bubble" 繼續將性愛種族政治混為一談，結局一幕殉道殉教殉情令人心情難以平伏；於是返去再睇 Woody Allen box set，"Midsummer Night Sex Comedy" 總算可以讓我笑吧。

電影節陸續有來，侯孝賢首部外語片夥拍仙姐，聖誕檔期較為期待就只有 bee movie（另友好推介 alethio），係時候睇返一大堆買落大半年 dvd，淨係廿四集「名偵探柯南」+ Simpsons season 9 都要成三日紅假至煲得晒...

反而係睇完「又一個叱吒十年」覺得三首實在唔夠喉，＜再見悲哀＞固然及不上尾場，大部分觀眾只係因為有特別嘉賓而興奮，＜前塵＞係林小姐首度奪得叱吒女歌手金獎獻唱曲目，雖然我估商台製作唔係因為呢個原因而揀呢首，＜願＞同＜追＞我成日覺得係兄妹作，第一次同一個 rundown 聽晒兩首，慶幸我們共同渡過了十幾年。
個人比較喜歡舊年那個十年 show：當晚楊小姐係容小姐上身，今次其實都唔係唱得好差，只是高下立見；尤其陳生表現超班，自己歌以至翻唱都難唔到佢，令我醒覺歌還是要繼續聽。最後決定買番 headphones（今次試 Shure），聆聽《呼吸》回味＜日子＞（原來舊年台灣夾埋今次香港演唱會總共唱過呢隻碟其中七首）。last but not least，小弟終於儲齊全套華星白板 cd，恭喜恭喜，someday some way...