你有一條管...

隨著節奏在...
小弟後知後覺，終於染指 youtube 了...
其實自己好少睇，覺得此等質素難以接受；不過近排開始漫長文物修復數碼化大工程，搵返奇形怪狀片段都可以同大家稍作分享。公司部機慢，所以唔會 embed 落 blog，得閒上去望望，同本部落格一樣，不定期更新...
擁抱你但願能 隨著我這感覺 風中輕輕轉身
如果睇完想留底可以 add 我 msn [wbs@whiteboardsandy.com]

蓮誌別注 - be who u're from...?

大家或者都知道＜come as you are＞係 Nirvana 91 年大碟《nevermind》第二張 single，至於「be who u are」則一直無從稽考（至少我唔知啦），不過今日唔覺意搵到另一個疑似源頭：
行 Page One 見到呢本過期《Another》雜誌半價，見 Julianne Moore 披頭散髮諗住都買得過，俾完 $$ 打開內頁就發現超值：inside front 有 10 版 Steven Klein 拍 D&G 08 A/W 廣告，內頁再加 4 版介紹呢個 collection，通常冇人睇 editor's foreword 又竟然俾我望到... 咦...？
話說攝影師組合 van Lamsweerde & Matadin 影封面之外仲有另一輯幫 13 個女演員求其影幅相，求其在於自備 wardrobe 任擺 pose，做番自己；13 位我識唔晒，不過竟然有 Isabella Rosselini，而我就比較鍾意下面呢幅 Claire Danes：呢期係 07 年 9 月頭出街，月尾 live 07 記招 poster 就見到同一句 tagline，真係唔知係事有湊巧定係移花接木（我一向都唔喜歡一個用 'you'，另一個係 'U'，覺得唔 consistent...）

蓮蓮有今日...

自林小姐過著飄泊浪蕩的野花生涯，其廣東 first plug 通常都略帶本土氣息：例如＜回歸＞驚鴻一瞥，＜哭＞mv 周格泰飄洋過海坐電車，以至＜本色＞巡遊匯豐、中銀、會展，不過始祖就應該係＜決心＞tvb mv：94 年穿梭大陸台灣日本等地，未出日文碟就不斷有日本音樂人原創曲目填上華語歌詞（前作有＜戀愛再不遠處等我＞同埋＜暗示＞／＜春雨＞，後者仲竟然冇日文版）；＜決心＞係闊別本地樂壇數月後之力作（91 至 93 年幾乎個個月有 plug 歌），咁耐冇見當然要聊表心繫香港之意，所以 mv 亦於中環鬧市實地拍攝，匯豐、中銀、電車站之外當然唔少得立法局大樓（pre-97），按圖放大可以睇埋 captions 了解路人甲乙丙之由來（我估呢本係《東方新地》）。youtube 竟然搵唔到呢個 mv，等我搵下自己床下底...
同場加映＜不如重新開始＞梳頭記，其實 tvb 版同星工廠版都係相近造型，亦同《號外》輯相好似（按圖看全文）：
生日賣大包：加送 92 年《SCMP Guide》報導廣西之旅，標題竟然有 'mercy'，呢位 editor 肯定係粉絲（again, click to view the article, and please support Watchdog / World Vision）

一世... 第二...

如果我沒有遇上林憶蓮，關淑怡應該是我的最愛... （雖然程度上或者還不足以相提並論）
關小姐兩個大頭封面都深得小弟鍾愛，我幾肯定呢件綠色西裝褸影全身唔會好靚。
前文提及關小姐頗適合唱改編歌，寶記索性一雞兩味：印象中第一次見白板碟係原曲同廣東改編版本一併收錄，查實改編歌詞以至編曲亦忠於原著；可能因為趕年尾頒獎禮，《love is forever》大碟基本上係全改編歌，跟同年暑假推出《金色夏季》剛好相反（得一首＜午夜狂奔＞改編自瑞典姊姊花組合 Lili & Susie）。而呢隻《favourites in originals vol. 8》亦收錄 Gregorian 另一首＜So Sad＞、＜白費心機＞改編自 Vanessa 'Wilhemina' Williams、仲有＜熱愛 can't let you go＞（都係來自 Lili & Susie）等原裝正版。
無端端有一個關淑怡演唱會，本身已是 unexpected，如果求其唱以下一首，就真係超乎想像值回票價（已成功由山頂 upgrade/downhill 到第三行）：
＜繾綣 28800 bps＞- 雖然已經係 terabyte 世代，我們在網上談情說愛卻有增無減，所以我更嚮往 live
＜忘記他是她＞- 寧願佢唱呢首多過＜忘記他＞，少有 CY Kong crossover 陳輝陽，最好有 strings 現場伴奏
＜cucurrucucu paloma＞- 我唔介意套戲冇佢份，不過連首歌都冇埋就太過可惜
＜他需要你她需要你＞／＜月光曲＞- 呢兩首同類，都係有兩個版本（廣東 vs 國語／合唱 vs 獨唱），編曲同唱法都唔同，求其唱一首我就已經心滿意足
＜心急＞- 個人 ultra-unexpected 之選 ，你諗下今時今日要佢唱「思想雖開放 談吐也爽朗 人卻永不放蕩」，我就真係想像唔到會係點喇

我的80年代...

童年你與誰渡過...
如果劉美君演唱會如此 80 年代，我認為 Jerald 亦應記一功~

我懷念的 - yes!

其實唔係特別懷念...
唔聽港台，唔鍾意倪震，唔係見有林小姐（仲要係獨家相）都唔會買《Yes!》...第一輯 SL Yes! 咭有兩張，係呢輯相轉黑白，背面係＜再生戀＞／＜愛上一個不回家的人＞歌詞，即係 91 年；第二輯變番彩色，後面印有「永遠支持林憶蓮」之類無聊 slogan；打後都係普通宣傳照，最後一輯係 94 年，歌詞係＜赤裸的秘密＞。偶然有一兩張係閃咭，不過我覺得唔閃仲靚，其實我自己好少去抽，其他玉女粉絲同學抽完唔要都會自動俾我。
同場加映 SK《真情》漏網照，效果同封面果然爭好遠... btw, 小弟有山頂飛多，原價出售有冇人認投？（10% off for SL／SK fan club members）
Apr 24 (Thu) - aisle 45, row 34, seats 88-89 [aisle]
Apr 25 (Fri) - aisle 45, row 35, seats 88-89 [aisle]

禁禁禁禁禁劉美君...

早幾日睇返無線音樂台訪問，＜大開色界＞播唔夠半首未倒奶就冇得睇，其實之前睇 youtube 覺得咪又係咁，反而新碟另一首＜私人補習＞仲梗，樂而且淫；不過劉美君「禁歌」太多，下面嚴選五大另類 guilty pleasures：
- ＜玩玩＞／＜我估不到＞／＜事前＞：《赤裸感覺》包辦三首，冇揀＜事後＞，覺得前戲身心更刺激；其實三首主題都係紅杏出牆，一般「信女」歌手邊夠班唱？＜玩玩＞女權至上無悔獨立宣言，＜我估不到＞以故事表白純屬意識越界，＜事前＞靈慾交戰講到冇得揀其實都係自己揀，配合埋《四度危情》音樂特輯（附劉華金句），論概念完整絕對唔差過林小姐
- ＜多些給我那些＞：原名＜事前事後之間＞，左右對聯迫爆中間個貞節牌坊，不過我總覺得歌名係林振強回應周禮茂＜這麼那麼怎麼＞；同碟林振強有＜夜已變得騷了＞，後來周禮茂又有＜最騷的夢＞，可見某些字眼適合某類型歌手（周仲寫多首＜搔我心底癢＞，狀態化成動作）
- ＜娃娃歲月＞：冇錯，呢首係小弟禁歌之首，平時聽《不再娃娃》＜China Girl＞之後一定要 fast forward；聽新曲＋精選以為冇 intro 一段「外婆叫我小寶寶...」冇咁難頂，點知聽兩次都喊（第二次仲要身處公共空間，雖然周圍冇乜人）。Dick Lee 旋律一貫動人，倒是劉、周洗盡鉛華（定係應該話洗心革面？），再加上小弟個人感情分，令呢首＜前塵＞姊妹作地位超然（seriously，有一期我仲超鍾意食潮州粉果...）
92年12月，歲月逍遙音樂會@ AC Hall，因為第二日要考 Biol 而冇去睇（中四文科都要讀一科 science，好驚唔合格，個阿 sir 又面目可憎，而家做補習天王反而見佢笑容滿面），屬小弟少數之人生憾事，於是今次一早（未知有林小姐）就買定飛（雖然係山頂）；由冇（話有）嘉賓變成 80 年代群星懷舊晚會，唔知會唔會搵 Eason 唱番首＜午夜鳴＞？（雖然我更期待睇／聽 Jerald 點樣由細玩到大...）這晚 get on high [buy tickets]

watchdog / pizza

林小姐聯同 kiehl's 攜手為 watchdog 監護者早期教育中心籌款，將位於九龍佑寧堂的前 sunnyside 幼稚園改建成「監護者」新校舍，為更多 6 歲以下、有特殊需要的小朋友，提供早期教育及訓練。sunnyside 位於佐敦道近覺士道，小弟細個做童軍經常路過；為延續日行一善精神並與林小姐共襄善舉，小弟下月將舉辦一步一生步行籌款，迫一眾友好行山兼／或捐款，目標籌得四位數字（個 range 都好闊...），有意 sponsor 我歡迎電郵小弟，$100 以上會發收據作扣稅之用。
／
近日派對指定餐廳當然係 pizza hut，呢個露絲瑪莉薄餅都唔錯（雖然個人比較鍾意上一款），不過竟然送漏兩客小弟至愛蘑菇湯 -_-
細個覺得去 pizza hut 都算豪，懶有歐陸風情，當然後來發現係港式 'fusion'；愈大愈揀擇，寧願平日勁求其偶然食餐好（／懵），all-time favorites 係 amaroni's assorted mushrooms 或 cafe o mushroom + pesto...（不如星期六去？）

才發覺很久沒有...

＜哭＞原版 intro 頭三粒音同 mv 導演周格泰個名竟然同音，十多年來都覺得相當吊詭（作曲編曲都應該唔係咁識廣東話...）
可能忙於記錄，可能編曲改動太大而產生疏離感，睇十場 live 07 竟然冇喊過，點知...
是夜本來去睇《最遙遠的距離》，不過友人 SL（sick leave），求之不得：即刻去信和買（舖頭仔 $168 送海報，其他幾間都要加 $10），搵個合適場地（sony projector／六呎屏幕／一對 bose 161 喇叭）重溫盛況。
當然係先睇 disc 3：＜詞不達意＞都仲 ok，＜為你我受冷風吹＞就不能自已，畢竟以為冇機會再聽呢個版本，去南京會唔會再唱？
disc 1 好似睇 orchestra recording，之前留意唔到某幾首歌有某種樂器都睇得返，最感動係兩首單字歌（可能因為剛剛睇完 documentary），邊睇邊喊... 蓮教果然異常 cathartic，同 televangelism 有得揮~
disc 2 只係睇番＜incomplete...＞，都係想像唔到去到 K 點唱...
你有多久沒有感受自己？look inwards, be who u are...